صح ان عظمي رك والشيب اشر. لكنني بالحب ضليت وامسيت.. ... امسيت مايمسي في القيد عنتر. من شان عبله او كما قيس جنيت.. ... حبي لها ماكان في بال يخطر. ولا سوا محبوبتي يوم حبيت.. ... على نصيبي احمده والمقدر. منها حرم قلبي ونا ما تناسيت.. ... فارقتها والقلب مني تفطر. نهدت من داخل صميمي وانيت.. ... بعد الفراق اعزمت عنها ادور. دورت لاكن لا اثر يوم لاغيت.. ... واعلنت بالبشرا لمن با يبشر. وآخر خبر عنها وصل دون توقيت.. ... لاغيتها لاكنني كنت منكر. اني امام الي لها الامس حبيت.. ... حتى مزاجي من لقاها تعكر. قالو وصل يوم اللغئ ذي تمنيت.. ... وقلت لا والله ماهي كريتر. لي في صباها سيت فيها وسويت.. ... جاوب عليا رد يا خور مكسر. ولا عسا مايوم يالخور رديت.. ... وين الزمرد وينه اللول والدر. كيف اسلبوها حليها واليواقيت.. ... وين الجمال الي في الامس يبهر. من كان قولي لاجلها ليت ياليت.. ... من بحرها ينذاق في ماه سكر. اليوم ملحه مر والريح حلتيت.. ... الوضع من اسوا لاسوا تدهور. ملاك طاهر زوجوها بعفريت.. ... الفل والكاذي مع العود لاخضر. عطرتها واليوم عطر البواريت.. ... ليش الجناين بدلوها معسكر. ليش المعسكر للفلل والحوانيت.. ... لاسامحك يامن عليها مسيطر. ليتك ترجعها مثل يوم شليت.