السلام عليكم ورحمه الله وبركاته

اتمنى كل واحد على صفحتي يقرأ هذا الكلام و يعطينا رأيه

كلنا سعيدين بأن عجلة الحياة في عدن شوية تتحرك و بدأ يكون في نشاطات مختلفة و أننا نقاوم كل اليأس و الدمار الي حولنا بالنشاطات الثقافية و الفنية و التنموية لأننا نحتاج لهذا فعلاً

ندخل بالقصة أو المشكلة زي ما تحبوا أسموها سموها.. المهم .. نحنا الرسامين ناس و بكل صراحه و شفافية مفلسين .. عايشين بالبريستيج بس .. و اني كخريجة من تسع سنوات بدون شغل اتنطط هنا قليل و هناك قليل و مافيش حاجه ثابته أصرف على الرسومات دي من أدوات و غيره بدون فائدة أو عائد يذكر تقريباً و لما احب اشترك بمعرض زي المعرض الي بيقيمه مكتب الثقافة في عدن طبعاً مشكورين انهم أصلا يحركوا عجلة الثقافة بس ليش تحط شرط اني لما اقدم لوحة 70*50 عادك تتشرط و تقول مع ايطار.. و إطار حاجة زي كدا تقريبا 12 الف.. ليش .. دا و كلنا بعدن مفلسين و عاده كمان نحنا أغلبية الرسامين بدون رواتب مافيش معانا دخل نصرف على دي الشكليات و لا تقولش المبرر الغريب الي هو عشان شكل المعرض يكون أنيق .. لان في المعارض الدولية بالخارج ما يطلبوا كشرط أساسي الايطار .. ليش ضروري بكل حاجة حلوة لازم تنكدوا علينا .. و من هنا اني أوجه كلامي لكل المثقفين و القيادات و كل إنسان في عدن اني رغدة كمال مصطفى اكتب هذا و أني صاحبت مؤهلات عالية و برضه بنفس الحفرة .. ساعدونا لا تنكدوا علينا .. حاولوا تسهلوا الأمور لأننا رغم كل الي نعمله مافيش منكم أي إجابة لا نفع انجازات نقدمها لنا و للوطن و لا نفع شيء قولولنا كيف بننهض بالمستقبل و الا هو هدرة و بس و انتوا تشتوا تتمنظروا على ظهورنا .. فهمونا لأننا تعبنا و نحنا نحاول نفهم .. قدنا ولا حصلنا منكم دعم و لا تكريم و لا شكر ولا تقدير أقل حاجة لا تنكدوا علينا.

و شكراً