جلسة سمر دان في مدينة ( صنعاء ) بتاريخ 13 اكتوبر عام 1990م حضرها من الشعراء :

حسين ابو بكر المحضار ، د. سالم عمر بكير ، ناصر بن ناصر ، والمغني ( عبدالله أحمد محروس طبو عابد" .

المحضار :

ما يغني الا العاشق الفرحان

أما أنا شف خاطري مليان

وان با تسلينا رعاك الله با تلقي جماله

رد الجمل حسب العوايد لوله لو كنت جمال

د . بكير :

في وسط صنعاء با سجع بالدان

حتى يزول الشوش والأحزان

وتسلي الشخص الذي مسكين تتقلب حواله

في شهر أكتوبر حضرها حس معه أقوال في الحال

المحضار :

صنعاء وفيها اللول والمرجان

والجوهره لي ما لها أثمان

طرحت فيها مهجتي وطلقت عقلي من عقاله

والعقل يلقي كل شيء لا قد وقع في ناس عقال

بن ناصر :

صنعاء اليمن تحني على الزقران

كل من وصلها تنطفي النيران

من قبل ما يدحق ثراها أو يدحق في جباله

من كل شق يحمي عليها بحرها وبرور وجبال

المحضار :

ما باك تسمع كلمة الشيطان

والا يغرونك عيال الجان

يتفرعن الشيطان بعض احيان ويعلم عياله

لا تسلك العوجاء فقه واصبر على بيرك ومعجال

د . بكير :

واليوم في صنعاء معي ميدان

وقيس بيدي دورة الأزمان

وكل شي بالصبر يتحقق ولا تفيد العجاله

والساس يبغى له بصر وعقل متمكن وعمال