هذه القصيدة جواب من الشاعر الشعبي علي حسين البجيري على أحمد العامري، على القصيدة التى ارسلها له عبر الإنترنت، جواب على قصيدة "لا عاد با وحدة ولا نا وحدوي".

24/4/2014م

يا مرحبا حيا بقول العامري

يوزن عدن كله وحي المصعبين

وابين ترحب لا نواحي مرتعة

ومن ثره لا رأس شامخ مذوقين

يا مرحبا ما حن من بطن البرن

واسقى الأعادي نار وامسو شاردين

العامري خالي وأنا معتز به

نعم النسب والأصل لا قالو منين

قلنا هلالي أصل من ساس العرب

تاريخهم حاضر وعند الأولين

بو زيد مرجعهم رفيع المرتبه

بدوي عريق الجد له موروث زين

اتنسب الأخوال يأتيك الولد

ما بنكر أخوالي أبد نا بن حسين

ونا بجيري من رؤوس العوذله

ذي ترهب الشيطان وإبليس اللعين

تاريخها محفور في صم الحجر

وسيلها داوي وصابتها مكين

يا مرحبا مليون حيو من ولب

من رأس حيد الكور قولو مرحبين

يا خال بالوحدة تحقق حلمنا

لكنه تحطم مع مر السنين

كنا نقدس وحدة الشعب الأبي

نضرب بها الأمثال عند الحاضرين

لكنها ماتت وواروها الثرى

ادعوا لها بالمغفرة يا مسلمين

ماتت وصلينا عليها كلنا

من مات هل يرجع بربك يا فطين

أعظم تعازينا نقدمها لكم

في موت وحدتنا ومبداها الأمين

ماتت على أيدى "الحثالات" الغجر

ذي شوهوها وأحرقوها مرتين

واليوم لك صنعاء ولى بندر عدن

ما بتداوي الجرح إلا دولتين

إيش عاد من وحدة قفاء هذا الخزاء

لو قلت برضى مارضي الآخرين

لا عاد أبا وحدة ولا تركن علي

ترجع لك البقشة وأنا لي العانتين

ذي دمر الوحدة ودمر مجدها

لا زال يرقص والشوادي يحجرين

ما دام والشيطان عاده ما خرج

وإبليس يطبل والثعالب يرقصين

والله ما تهدى ولا يصلح عمل

إلا بدفنه حي والمتعاونيين

ضاعت على الباني تصاميم البناء

كلما رفع طابق يهدو طابقين

صنعاء تباء الحجاج يحكم قصرها

وترفض أهل العفو والمتسامحين

من سل سيفه با يومن سوقها

ومن رمى سيفه خرج في ليلتين

وعبدربه خير له يرجع عدن

ولا احسبه مفقود ضمن الضائعين

لاسد الخبرة سقط من بينهم

باترجع القوة بيد الأحمرين

با ترفضه صنعاء وبا ترفض عدن

تستقبله لا جاء مع المتأخرين

أحسن يقايسها وعاده في نسم

ولا سقط من رأس حيد الحيمتين

ذي ما معه قوة إرادة ينسحب

صنعاء تباء حاكم غليظ الساعدين

وعبدربه ردنا للقبيلة

والثور والنعجة وهاتو بندقين

هل هذه الدولة وهل هذا الأمل

ذي ثار من أجله جيوش الثائرين

هل واجب الدولة تحكم من غلط

ترسل له البندق وترسل موفدين

أم واجب الدولة تشدد أمنها

وتقتل القاتل وتنهي القاطعين

هل ثورة التغيير أخطت دربها

وبدلت ظالم بمثله ظالمين

خابت أماني الشعب واتلاشا الأمل

وخاب ظن المنتظر والأملين

لا سامح الدلال ذي ودف بنا

وباعنا بالرخص بيع السارقين

والصوب دامي والجراح اتعمقت

والعين تبكي والكبد قدها طحين

ما كان ظن الشعب بالوحدة كذا

كنا نفكر أن حارسها أمين

واتضح أنه مجرد بلطجي

عليه لعنة شعبنا دنيا ودين

خان الأمانة قبح الله صورته

سلم بلدنا لطغاة المارغين

سجل له التاريخ صفحة مخزية

وأخزاه بين الناس رب العالمين

نريد دولتنا تعود الصارمة

لا عاد ذا وجهي ولا جب نعجتين

دولة تعيد العدل فيما بيننا

ترجع عدن قلعة لكل النيرين

وإيش من عاد وحدة بربك قلنا

لا يلدغ المؤمن يقولو مرتين

واقبل تحية خاصة يا لعامري

بالفل والكاذي وزهر الياسمين

والعفو لا شي زاد ولا شي قصر

قدنا قرابة وأهلنا متعارفين رد إعادة توجيه