أثارت المطربة المصرية شيرين عبدالوهاب، أمس الثلاثاء، حالة من الجدل بشأن علاقتها بطليقها المطرب حسام حبيب.
وقالت شيرين عبدالوهاب في تصريحات تلفزيونية، إنها كذبت كثيرًا من أجل تحسين صورة حسام حبيب، مضيفة: "عاوزة أستغفر ربنا على الكذب اللي كذبته عشان أخلّي صورة إنسان تبقى كويسة، وأنا كذبت ودي أكتر حاجة ربنا مبيحبهاش".
وتابعت: "كدبت في حاجات كتيرة أوي، لأني بنت أصول وكنت عاوزة أرفع صورة إنسان ممكن يروح في يوم من الأيام يتجوز من عيلة تانية وأخلص منه، ولو كنت قلت كلام وحش وقتها مكانش هيعرف يتجوز، وأنا نفسي يتجوز ويبعد عني".
واستدركت قائلة: "حسام حبيب إنسان مؤذي جدًا.. أقسم بالله العظيم خسرني كل الناس.. خسرني أبويا وأمي وأختي وصحابي والسواق والشغالة.. كان فاكر الكل متآمر عليه.. لدرجة إنه حسسني إن الدنيا تآمرت إننا منبقاش مع بعض.. صدقته مع إن الحقيقة مش كده".
وواصلت: "حسام حبيب لازم يتعالج نفسيًا لأنه عنده حب امتلاك.. وعنده ابتزاز من كل شيء.. لو غنيت أو عملت فرح ناجح كان بينكد عليا.. يقولي إنتي كنتي ماسكة الولد كده ليه وليه حاضناه كده رغم إنه أد ابني".
واختتمت تصريحاتها: "كنت عايشة مع راجل مش بيشتغل ولا بيخرج ولا بيشوف أهله ولا أصحابه، كل همه حب الامتلاك، ومع ذلك فضلت جنبه وهو لا يعرف إلا فكرة حب الامتلاك، وصبرت لأني كنت بحاول أنجّح الحب ده، ومكنتش بحب أتهزم، وأنا بطبعي بكون خدامة الراجل اللي بعيش معاه".
